Анонс событий благочиния

 г.Борисов

Сейчас в благочинии

Пасха 2023: Пасхальнае пасланне Патрыярха Маскоўскага і ўсяе Русі Кірыла

Дата события

Узлюбленыя ў Госпадзе Праасвяшчэнныя архіпастыры,

пачэсныя прасвітары і дыяканы, богалюбівыя інакі і інакіні,

дарагія браты і сёстры!

 

Да вас, праваслаўных хрысціян, якія жывуць у многіх краінах свету, якія прыйшлі ў храмы і моляцца ў дамах, я звяртаюся цяпер, каб ад сэрца, напоўненага духоўнай радасцю, павіншаваць з вялікім святам Святой Пасхі і па спрадвечнай традыцыі пераможна ўсклікнуць:

  ХРЫСТОС УВАСКРЭС!

На працягу двух тысячагоддзяў менавіта гэтымі словамі Святая Царква ўрачыста абвяшчае людзям добрую вестку аб спасенні, якое дараваў нам Бог. У гэтых словах —  агонь нашай веры, сіла любові, аснова надзеі, краевугольны камень Царквы, цэнтр новазапаветнага паслання свету, незмяркальнае святло асветы і крыніца натхнення, сутнасць хрысціянскага жыцця і ўся наша будучыня.

Што б ні адбывалася ў гэтым зменлівым свеце, які часам не стрымліваецца і раздзіраецца супярэчнасцямі, якія б цяжкасці і выпрабаванні ні выпадалі на нашу долю, мы ведаем, веруем і прапаведуем: пасхальная радасць пра Ўваскрэслага Спасіцеля застаецца нязменнай і ўсёпераможнай.

Які ж сэнс гэтага галоўнага хрысціянскага свята? У імя чаго і навошта Сын Божы сышоў на зямлю, прыняў вобраз раба (Флп. 2, 7), выцерпеў пакуты, быў распяты на крыжы і ўваскрэс? І што трэба рабіць нам, людзям ХХІ стагоддзя, каб сапраўды стаць удзельнікамі і наследнікамі перамогі, здабытай Хрыстом над смерцю?

Царква дае нам адказы на гэтыя пытанні. Яна сведчыць, што Сынам Божым, Які ўцялесніўся ад Праблагаславеннай Дзевы, пекла ўзята ў палон, Адам вернуты, праклён знішчаны, Ева вызвалілася, смерць памерла, і мы ажылі (нядзельны Багародзічны на хваліцех, глас 2). Сапраўды Гасподзь ажыўляе нас Сваёю любоўю, пазбаўляе ад страху смерці і тлення, лечыць душэўныя і цялесныя немачы, падтрымлівае ў цяжкасцях і выпрабаваннях, суцяшае ў смутку і тузе, дапамагае кіравацца спасіцельным шляхам, які прыводзіць у жыццё вечнае, калі ўтрэ Бог кожную слязу з вачэй іх, і смерці ўжо не будзе; ні плачу, ні енку, ні болю ўжо не будзе (Адкр. 21, 4).

Здзейсніўшы подзвіг адкуплення, Гасподзь Сваёй  ахвярай на крыжы і слаўным Уваскрасеннем адкрыў вароты раю для ўсіх. З таго часу і дагэтуль кожнаму чалавеку даруецца магчымасць успрыняць Хрыста ўсёй душой як сапраўднага Бога і Спасіцеля, Які паслаў благадатную сілу для праведнага жыцця і дзейнага ўдзелу ў ператварэнні свету.

Свяціцель Мікалай Сербскі, вядомы багаслоў мінулага стагоддзя, разважаючы пра Пасху, пісаў: «Хрыстос уваскрэс — значыць, жыццё мацней за смерць. Хрыстос уваскрэс — значыць, дабро мацней за зло. Хрыстос уваскрэс — значыць, усе спадзяванні хрысціян апраўданы. Хрыстос уваскрэс — значыць, усе жыццёвыя цяжкасці вырашаны» (Думкі пра дабро і зло). І гэтая пасхальная радасць, радасць  сувязі з Богам і сцвярджэння новага жыцця (Рым. 6, 4) на пачатках дабра і справядлівасці дасягае сэрцаў мільёнаў хрысціян, натхняе на справы любові і міласэрнасці, дапамагае пераадольваць нягоды, суцяшае ў выпрабаваннях, дае надзею тым, хто ў адчаі, умацоўвае маладушных.

У светланоснае свята Пасхі нашы асаблівыя малітвы звернуты да Бога аб людзях, якія знаходзяцца ў зоне ваенных дзеянняў. Мы, як хрысціяне, не можам заставацца абыякавымі да бед і нягод нашых братоў і сясцёр, сэрцы якіх апалены агнём міжусобнага канфлікту, таму мы ўзносім да Госпада асаблівыя просьбы  аб тым, каб Ён па Сваёй міласці і добрасардэчнасці вылечыў цялесныя, а найбольш — душэўныя раны, суцешыў усякі смутак і дараваў брацкім народам, якія выйшлі з адной Дняпроўскай купелі хрышчэння, трывалы і справядлівы мір.

Як зямны шлях Спасіцеля быў напоўнены намаганнямі і ахвярнай любоўю да людзей, так і мы пакліканы прыпадобніцца Яму ў служэнні бліжнім. Бо любая, нават самая маленькая дабрачыннасць, пераадоленне ўласнага эгаізму дзеля дабра другога чалавека набліжаюць нас да Бога — Крыніцы жыцця і неўміручасці, а значыць, робяць больш шчаслівымі.

Уваскрэслы Гасподзь, паводле Свайго нялжывага абяцання, Які прабывае са Сваімі паслядоўнікамі ва ўсе дні да сканчэння веку (Мф. 28, 20), няхай спадобіць і нас, грэшных і слабых, але якія прагнуць праўды і шукаюць спасення, па завяршэнні зямнога шляху наследаваць блажэннае жыццё, каб у Нябесных абіцелях, ўгатаваных ад стварэння свету (Мф. 25, 34), разам са святымі, у вечнай славе Яго царстваваць (свц. Амвросій Медыяланскі. Гімн «Табе Бога хвалім»). Аб гэтай радасці чакання будучага Царства любові, калі будзе Бог усё ва ўсім (1 Кар. 15, 28), Царква прапаведуе заўсёды, а найбольш — у светлыя дні пасхальнай урачыстасці.

З увагаю прыслухаемся да яе спасіцельнага воклічу, які заклікае нас вуснамі апостала Паўла святкаваць Пасху не са старою закваскаю, не з закваскаю зла і каварства, а з праснакамі чысціні і ісціны (1 Кар. 5, 8). З увагаю прыслухаемся і пастараемся жыць паводле Бажэственных запаведзяў, словам евангельскай праўды і добрымі справамі, усім жыццём сваім прыносячы сведчанні блізкім і далёкім, што сапраўды ўваскрэс Хрыстос, бо  Яму належыць усякая слава, пашана і пакланенне на вякі вякоў. Амінь.

 ПАТРЫЯРХ МАСКОЎСКІ І ЎСЯЕ РУСІ

Пасха Хрыстова

2023г.

Фото
Image